Ez dakit inoiz BNPL (Buy Now Pay Later) akronimoaren berri izan duten. “Orain erosi eta gero ordaindu” bezala itzul genezake. Munduko zenbait eremutan oso hedatuta dagoen ordainketa-praktika da. Bereziki online erosketetan. Badakizue Internet iritsi zenean eta bide horretatik erosteko praktika, gauza asko aldatu zirela. Logistikak eta ordainbideek aldaketa handienak izan zituzten. Hori dela eta, bai AEBetan bai Europan, Interneteko erosketa-prozesuei babesa ematen dieten hainbeste enpresa jaio dira. Eta hori dela eta, Amazon, urteen poderioz, ia operadore logistiko bihurtu da, eta Google edo Apple, ordainbideetan interes handiak dituzten enpresak.

Zatikako ordainketaren kultura hori, berrogei urtera arteko belaunaldietan asko barneratzen ari dela, eta, gainera, Europan indartsu sartzen ari dela da kontua. Duela urte batzuk arte, ordainketa-metodo hori oso ezaguna zen balio handiko artikuluetan. Produktu horien prezioaren ondorioz, erosketa alboratu egiten zen. Hala ere, kamiseta bati edo eguzkitako betaurreko batzuei buruz ari bagara, erraza da pentsatzea edonork ikus dezakeela eskura, eta, beraz, erosteko tentazioa izatea. Estatu Batuetan, adibide adierazgarri bat hartzearren, Affirm da ordainketa horien hornitzailerik ezagunena. Ez du komisiorik kobratzen ordainketan berandutzeagatik, eta ez du kredituen egiaztapenik egiten.

Z belaunaldiaren eta millenialen erdiak ordainketa-metodo hori erabiltzen du. Guztiak, beraz, 1980tik aurrera jaiotakoak. Ehuneko hori laurden batera jaisten da aurreko belaunaldiez ari garenean. Teknologia digitalen batek eragindako enegarren belaunaldi-talkaren aurrean gaudela uste dut.